اجمل قصة حب رومانسيه الحلقة الاولى

النهارده جبتلكم حكايه جديده جدا قصه حب رهيبه رومانسيه بدرجه فظيعه زى روميو وجوليت وقيس وليلى عنتر وعبله .

بس القصه دى بين اتنين حيوانات ايوه مش مصدقين بين اتنين حيوانات يمكن القصه دى من خيالى بس ساعات الحيوانات بتخلص لبعض اكتر من اخلاص الانسان للانسان.

والقصه دى بتتكون من كذا حلقه وكل شويه هنزل حلقه جديده ودا حسب رغبتكم


الحلقه الاولى :

تبدأ بالخروف سعيد ودا روميو القصه ودا خروف شاب مفتول العضلات و محترم والناس بتحبه وبتحترمه وكان ليه صديقين اللى طلع بيهم من الدنيا

الديك فرحات ودا كان دايما فشار وكان وحيد امه بعد ما ابوه طلقها وسافر بره.

والكلب لطيف ودا كان كلب جدع وصاحب صحبه وابوه وامه اتقلبت بيهم العربيه على الكيلو 56طريق السويس وكان ليه اخت وحيده نفسه يجوزها ويسترها .

وكان دايما الثلاثه بيبقوا مع بعض وكل يوم يقعدوا على قهوه عبده الفيل اللى على ناصيه الشارع يعنى اللى عاوز يضربلوه حجرين شيشه تفاح وكده

وكان دايما عبده الفيل يتخانق معهم علشان مدفعوش الحساب القديم اللى عليهم
وعاده الديك كان دايما بشخصيته المضحكه يقوم يتخانق مع عبده الفيل وعاوز يضربه
ودايما يقول عبارته المشهوره "ان كان فاكر نفسه فيل فانا ديك يعنى من سته الصبح اصحيك"
والناس تقعد تضحك عليه ويخدوه صحابه ويمشوا وهو برده مصمم يضرب الفيل "طبعا بيسطعبط ماهو عارف ان صحابه هيحشوه"

وف يوم من الايام كان رايح الخروف سعيد يجيب 2كيلو برسيم عشان العشى
فعدى على الكلب لطيف عشان يجى معاه بس الكلب لطيف كان مشغول جدا وكان قاعد هو وعمه مع عريس جاى لاخته فاتاسفله وقاله مش هاقدر اجى معاك.

خد بعضه الخروف سعيد وراح على الديك فرحات عشان يجى معاه بس لقى الديك مش موجود هو وامه فسأل بطه بلدى جارتهم قالتله دا راح هو وامه يزوروا جده فى عياده الدكتور البيطرى عشان بيموت .

خدبعضه الخروف سعيد وراح يجيب البرسيم وهو ماشى فى الطريق شاف حاجه غريبه!!

شاف 3جديان بيعسكوا معزه زى القمر ماشيه لوحدها وبيحولوا يتحرشوا بيها
ياترى يعمل ايه الخروف سعيد؟؟؟؟


دا اللى هنعرفه فى الحلقه اللى جايه

هههههههههههههههههههههه