اجمل قصة حب رومانسيه الحلقة التانية

كنا وقفنا فى الحلقه اللى فاتت ان الخروف سعيد لقى 3جديان بيحولوا يتحرشوا بمعزه زى القمر ماشيه لوحدها.....

وطبعا الخروف الشهم عمره ماهيسكت على حاجه زى كده جرى الخروف بسرعه على 3 جديان ودخل فى خناقه عنيفه معهم وقرن من هنا على قرنين من هنا ونطحه من هنا على نطحه من هنا المهم قدر الخروف سعيد ان هو يضرب ال3 جديان ويخليهم يجروا قدامه....


ولكن فى اثناء الخناقه فى جدى منهم كسر رقبه ازازه وخبط الخروف بيها فى فخده جنب الليه كده واتعور الخروف سعيد

وبعد لما الخناقه خلصت #اتفرجروا على الرومانسيه#

جريت المعزه الجميله الرقيقه عليه وقطعت حته من الجيبه بتاعتها اللى كانت ياعينى لسه جيبها جديده مفرحتش بيها وربطتله الجرح اللى فى فخده واتأسفتله على اللى حصل وقالتله ان لولاه جنبها مكنتش تعرف ايه اللى هيحصلها

وبص الخروف سعيد فى عنيها وهو مش عارف يتكلم وحس بأحساس عمره ماحسه قبل كده حس انه نفسه يفضل جنبها على طول وانه يفضل على طول حاطط عينه فى عنيها ماينزلهاش
وان هى دى الانسانه اللى نفسه يكمل عمره كله معها ""طب المعلم ""

حب من اول نظره وهو فعلا معاه حق المعزه تتحب كانت شعرها اصفر وعنيها زرقه وحطه ايلينر وايشادوا وظبطه الميكب بتاعها تمام


المهم فضل الخروف سعيد ماشى معها لاول الشارع من غير ولا كلمه حاسس ان لسانه وقف ومش عارف يقول ولا كلمه وهى كذلك فضلت تبصله كتير والظاهر ان المعزه بردك طبت .....

ومن كتر الرومانسيه اللى كانت بينهم نسيوا حتى يتعرفوا على بعض او حتى يعرفوا اسماء بعض وعلى اول الشارع وقفلها الخروف سعيد توكتوك ودفعلها الاجره من فلوس العشى اللى رايح يجيبه ....

وروح الخروف سعيد على البيت وهو فى اسعد لحظات حياته ونفسه يطير من على الارض وفضل طول الليل سهران يفكر فى المعزه اللى عمره ماشاف عنين اجمل من عنيها ولا دق قلبه فى يوم لاى واحده غيرها كان احساس وشعور غريب اول مره يحسه فى حياته وفضل يسمع طول الليل فى اغنيه واحده للعندليب "اول مره تحب ياقلبى واول يوم اتهنى "امال ايه دا خروف رومانسى برده....


ونام الخروف وكله رومانسيه وحب ولكن للاسف كالعاده الديك فرحات من الصبح بدرى ازعجه وصحاه هو والكلب لطيف علشان يلحقوا مكان على قهوه عبده الفيل وراح الثلاثه للقهوه ولاحظ الكلب لطيف والديك فرحات ان الخروف سعيد متعور فى فخده فسألوه عن سبب الجرح فبدا الخروف سعيد يحكلهم اللى حصل .

ولكن حدث شىء غير متوقع

وده اللى هنعرفه فى الحلقه الجايه

يا عيني على الرومانسيه
بجد زعلت على الجيبه بتاعتها